Transdonante en viajn manojn nian eldonaĵon, ni deziras proponi al la pli aĝaj loĝantoj de Bjalistoko sentimentalan vojaĝon en la pasintecon, dum kiu ili rememoros ludojn kaj ludilojn de sia infanaĝo. Siavice, al la pli juna generacio ni volas montri kiel kaj per kio iam ludis bjalistokanoj, kaj kiel oni pasigis liberan tempon – ankaŭ okaze de festoj.
En la libro ni donas la parolon al la bjalistokanoj mem. Ja ili – atestantoj de la historio – estas niaj gvidantoj tra la mondo, en kiu pilko kaj biciklo (ofte memfarata) estis la plej granda revo de juna homo, kaj liberan tempon oni pasigis kun aliaj infanoj, kiuj multnombre loĝis en la apudaj domoj.
